Deskripsi cerita “ I Lacur “ ditinjau dari segi pendidikan agama Hindu .

Kacerita di desa anu pagumian Daha, ada kone anak cerik madan I Lacur. Ia anak ubuh tur tusing ngelah panyamaan. Ia nglintik padidiana buka batun buluane. I Lacur buka adanne lacur pesan. Ia patamianga pakarangan asuluh balangan. Ditu ada laad meten teken bale. Nanging ento makejang suba tusing ada. Kewala ia ngelah rerompok dogen abungkul maraab sumi. Yen ujan paling ngalih don-donan anggona ngengsubin tuduh raabne. Pondokne ento madinding klangsah, misi plangkan reod, tikeh suba uek.

Yadin pakangane ento tusing misi umah, masih sai-sai risakina. Sabilang ia teka uli dija-dija, jemaka aritne, nglantas ngrisakin pakarangan, sambilanga mamula bayem, tuung teken tabia. Suud keto lantas ia ngengsubin pondokne. Luune gaenanga bangbang lantas tunjela. Semengan mara bangun ia lantas nyampat di pondokne muah di pekarangane. Suba kedas mara kalahina luas. Keto dogen gegaenne I Lacur . Yang ada anak nunden, tuara taen tulak. Nanging timpal-timpalne makejang nyailin muah mlegendahang .

Sedek dina anu I Lacur suba suud nyampat dipakarangane lantas pesu. Kenehne lakar ngalih dondonan anggona jukut. Mara teked di rurunge teka timpal-timpalne ajaka liu, makejang mlegendahang. Ada ngewerin,ada ngecuhin, ada nunggingin, muah ada ngentutin. Yadin keto I Lacur mendep dogen. Ada aukud madan I Klaleng ane paling kuala. I Lacur entutina, tunggingina muah getoka. Katuju pesan dugase ento layangan pegat. Cerik-cerike makejang malaib nguber layangan ento. Layangane ento ngengsut di punyan juete. I Klaleng tanggu malu mongkod punyan juet. Timpalne masih bareng merebut. I Klaleng encol-encol menek, tusing tawanga carang juete tuh bakat glantingina lantas empak. I Klaleng ulung maglebug. Mara tingalina baan timpalne I Klaleng ulung, makejang pada malaib. I Klaleng ditu pepetengan. Tingalina baan I Lacur I Klaleng plaibina baan timpalne ditu encol I Lacur nulungin . I Klaleng sangkola baan I Lacur abana kepondokne, lantas uruta baan I Lacur. Nyanane mara ia inget aduh-aduh tuara dadi baana bangun. Limane lung, batisne lih. Disubane I Klaleng inget, lantas I Lacur ngomong, “ Meme, jani tiang lakar mulih “ . Masaut Men Klaleng, “ Yeh Lacur enden malu , baanga ngidih pipis “. Masaur I Lacur,” Depang suba malu, buin pidan tiang ngidih “.Suud ngomong keto I Lacur lantas pesu. Teked di rurunge, tepukina anak tua matungked nyuun sok , misi kesela sarat. Anake tua magregotan. Tinggalina teken I Lacur lantas jagjagina , laut ngomong,” Dadong mai tiang ngabaang soke ento “. Lantas jemakina suuna sokne baan I Lacur. Anake odah kendel pesan jemakina. Suba teked jumah anake odah , ngomong I Lacur, “ Dadong dija jang soke ene ? “. Masaut anake odah, “ Nah dini Cening jang sok dadonge ! “, Lantas pejanga di balene.

Suud keto, ngomong I Lacur , “ Dadong jani lakar kalahin tiang mulih “ . Masaut anake odah, “ Enden, enden malu cening, ne baanga kesela “ . Anake odah nyemak kesela dasa besik lantas baanga I Lacur. Ditu I Lacur mulih kendel pesan ngaba kesela. Teked jumahne lantas ngae jukut misi kesela. Suba lebeng lantas angkida. Satonden madaar ia nanding jukut aji don limang tanding. Aturanga di paon abesik, di plangkirane/ semere abesik, teken diwangane abesik. Suud keto mara ia naar jukute ento. Petengne ia masare nglintik padidianga.

Gelising satua, kacerita manine I Lacur luas ka alase ngalih dondonan wiadin paku lakar anggona jukut. Dadi kalunta-lunta pajalane , saget ia nepukin pondok melah pesan, pakarangane bersih , tur misi bunga magenepan. Ane ngelah pondoke ento Ki Dukuh Sakti. Mara I Lacur ditu bengong saget medal Jero Dukuh. Mara cingakina I Lacur, lantas nikaina , “ Ih cening mai ja ! “ I Lacur tengkejut laut nyongkok lantas matur , “ Titiang I Lacur “.

“ Dija umah ceninge ? “ patakon Jero Dukuh. Matur I Lacur, “ Titiang nenten ngelah umah “. Lamun keto cening nyak dini ajak bapa ? “. Matur I Lacur, Inggih yan Jerone ledang titian ngiring “.

Kocap Ki Dukuh ento sakti buina pradnyan. I Lacur ajahina mesastra, muah agama . I Lacur seleg pesan melajah , makelo-kelo dadi ia dueg. Disubane kelih ajahina maubad-ubadan. Yadin ia suba nongos ditu nagging ia tusing engsap teken pondokne, sabilang pitung dina pondokne delokina tur bersihina.

Sedek dina anu I Lacur kone mulih uli di padukuhan. Di rurunge tepukina ada anak negak ngeling aduh-aduh . Ditu lantas paakina tur takonina. Anake ento ngorahan batisne gutil lelipi, suba beseh tur tusing dadi baana majalan. Ditu I Lacur ngalih kupas lantas bedbeda batis anake ento. Suud keto lantas sangkola ajaka ka pondokne, lantas gaenanga penawar tur ubadina.

Ki Jero Dukuh ngandika , “ Nah keto suba Cening , yan nuju nepukin anak sengkala patut tulungin. Yang nulungin anak eda pesan ngitungan pangwales. Mani puan pedas cai nepukin karahayuan, Krana Ida Sang Hyang Widhi kaliwat wikan. Anake demen metetulung, tusing ja kuangan nyama braya “ .

Kacerita jani Jero Dukuh mireng orta Ida Raden Galuh sungkan banget, Lantas dane ngandikain I Lacur, “ Ih Lacur, bapa ningeh orta buat Ida Raden Galuh Daha sungkan sanget. Makudang-kudang balian nambanin masih tusing nyidaan. Nah jani kema cening tangkil ka puri nambanin Ida Raden Galuh. Ne bapa maang cening ubad utama. Yadin amun apa sarat sakit anake, yan ene anggon ngubadin pedas seger “, keto pangandikan Jero Dukuh lantas I Lacur icena serbuk, lengis teken manik.

Tan ceritanan di jalan saget suba kone teked di puri. Dapetangan di puri anake bek nangkil, minakadi para patih, para punggawa, muah prakanggone lenan . Makejang ngon , nyingakin I Lacur tangkil. “ Ih Lacur apa alih cai mai ngaduk-aduk ? sing tawang Raden Galuh sungkan ? “.

Matur I Lacur “ Inggih Gusti Patih , titiang jagi tangkil ring Ida Sang Prabu “.    Buin Gusti Patih Ngandika “ Ih Lacur cai tangkil teken Sang Prabu lakar nambanin Raden Galuh , beh degag pesan cai Lacur , balian sakti tusing nyidayang nambanin Raden Galuh kalingke cai, enu pecehan “.

Dadi kapireng olih Ida Sang Prabu lantas I Lacur nikaina apanga tangkil. Lantas I Lacur matur ring ida Sang Prabu tetujone tangkil pacang nambanin Ida Raden Galuh.

Kacerita kone Raden Galuh tan eling ring raga , Ida prameswari nangis ngelut putrane . Ditu lantas I Lacur nambanin Raden Galuh buka pituduh Jero Dukuh. Disubane katibakin tamba mewastu Ida Raden Galuh eling ring raga tur mresidayang metangi , mewastu ledeng kahyun Ida Sang Prabu . Prajani Ida Sang Prabu mesesangi saha ngandika “ Cai Lacur, Jani nira ngadegang cai dadi Manca Agung dini di Daha, tur cai baang nira palaba, carik dasa sikut, tegal dasa sikut, muah pakarangan tekening umah. Jani cai nongos dini. Nira ngentosin adan caine jani susud madan I Lacur cai jani madan “ I SUBAGIA “  Keto pangandikan anake agung .

Tentang zablenk

saya seorang petualang demi sesuap nasi merantau dor to dor dari desa kedesa
Pos ini dipublikasikan di Uncategorized. Tandai permalink.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s